Lisula : I cunfratelli cantanu cù i residenti di l'Age d'Or

Stu dopu meziornu, parechji cunfratelli di u circondu di Lisula accumpagnati da cantadori di curale, sò vinuti à sparghje un bellu mumentu cù i residenti di L'EHPAD* l'Age d'Or.
Ind'a sala di riposu, s'eranu tutti stallati per pudè stà à sente per certi è ancu participà per l'altri, à quella bella animazione musicale. 

" Una di e funzione di e cunfraterne hè l'aiutu u prossimu. U prossimu pudemu cunsiderà ch'elli sò quell'anziani chì anu bisognu non solu d'aiutu materiale forse  mà sopr'à tuttu d'aiutu murale" spieche Santu Massiani, cunfratellu in u Giussani.

Canti di Natale, canti tradiziunale, letture di a natività, certi s'eranu avvicinati di più in più per pudè cantà è leghje cun'elli. 
Una volta à u mese dipò 2 anni, i cunfratelli animanu un attellu musicale per a sessantina di residenti. 
" U fattu d'integrà u cantu à un animazione chì i concerne, pensemu ch'ella sia una cosa bona. S'azzione, isse stonde di spartere, ponu esse utule per elli mà dinò per noi". 

A veghja, unepochi d'elli eranu diggià vinuti per fà u presepiu, cù l'idea di fà participà i residenti à a cunfezzione. " Hè un travagliu di long'andà per lià e voce è ancu per l'attelli manuali".  

Marine Calvo, presidente di l'associu è u stabilimente l'Age d'Or, una persona cusì mubilisata per i quelli anziani.
" Parechj'anni fà, quelli cunfratelli si sò pruposti per animà una volta à u mese un dopumeziornu musicale. Un fine d'annata, sò canti di Natali ch'elli sparghjenu. I nostri residenti sò in dumanda di quell'azzione. Cunnosceni e canzone, ghè u so patrimoniu". 

Una bell'azzione chì s'hè compia cù à distribuzione di rigali mentre u vesperinu. 

I diu più giovani cunfratelli anu rigalatu un bellu ramu di zingatopu è una scatula di cicculata à ogni persona. Belli rigali fatti incù l'aiutu manescu di u Leclerc di Lisula.