Corsica Libera s'oppose à la suppression de classes bilingues

 
Voici le texte de la conférence :
 
Corsica Libera vene oghje par ramintà chì a cunvinzione Statu-CTC (2016/2020) annunciava a generalizazione di e filiere bislingue in e scole materne pò in lu primariu . Oghje, semu in lu 2018 è chjodenu e classe bislingue.
 
Ramintemu chì in lu 2005 u pianu di sviluppu di l’insignamentu di a lingua è a cultura corsa di l’inziana CTC, era primurosu di mette in piazza un insignamentu bislinguu generalizatu in tutte e scole primarie (nantu à 7 anni da u 2007 sin’à u 2013), cù à tempu a valutazione di 300 maestri di scole in lingua corsa.
 
DUMANDEMU chì tutti i maestri abbilitati sianu affettati nantu à posti bislingui, cume quelli chì sò esciuti di u cuncorsu bislinguu.
 
Noi seme quì oghje  davanti à sta scola materna parchè ci hè una classa materna bislingua chì sarà chjosa à a riintrata prossima, quella di sezzione maiò.
 
CI DUMANDEMU:
 
Cumu si pò assicurà di mintene a filiera bislingua cacciendu un postu in scola materna, quand’ellu si sà chì à longu andà, a scola elementaria bislingua sarà minacciata anch’ella !
 
Quandu si sà chì a  lingua Corsa deve esse u prima fattore d’intigrazione, cumu pudemu accittà chì in una scola « REP » sia assicurata a mischiità suciale chjudendu una classa in u bislinguu?
 
Ramintemu chì quandu hè decisu una chjuditura, ùn si deve micca chjode in u bislinguu !
 
Semu cù parenti mubilizati cù attori culturali chì intirvenenu in a filiera bislingua, parchè  sta filiera hà un veru prughjettu pedagogicu è a lingua ne hè  un arnese.
 
Corsica Libera ramenta chì Sampieru, altra scola di a cità, perde dinò una classa à a riintrata à vene, ancu si a filiera ùn hè micca viramente ufficiale.
 
Ma ci sò d’altri casi in a Corsica sana : in Bastia, in u carrughju di San Ghjasè,  in Campanari, scola d'instituzione chì face parte di e prime scole diventate bislingue.
 
 Avà chì l’insignamentu dettu immersivu hà da principià infine à sviluppassi è fà e so prove, ùn pudemu accittà di rinculà invece d’avanzà!!!
 
In e nostre cità e responsabilità sò parecchje :
 
u prublema maiò di demugraffiaa manera d'infurmà i parenti a u mumentu di e scrizzionea manera di fà u dispacciu trà i sfarenti settori.U ritturatu, in e so scelte, salvà o chjode!Rinfurzà, a filiera bislingua o nò!
 
Corsica Libera cù quelli ghjunti à susteneci, dumanda ch’ellu ùn ci sia più chjuditure di classe bislingue ;
 
DUMANDA à a municipalità d'Aiacciu chì i direttori di e scole bislingue pudessinu participà à e cumissione dette di i « guichet unique » da pudè dà u so parè nantu à e repartizione ;
 
DUMANDA ch’ella sia fatta una campagna ubligatoria di prumuzione di a lingua corsa quand’elle sò aparte e scrizzione ;
 
DUMANDA chì i posti di sduppiamentu di i CP à a riintrata 2018/2019 sianu posti bislingui ;
 
DUMANDA chì u pianu di furmazione è di generalizazione di u bislinguisimu sia rinfurzatu è messu in piazza ;
 
RAMENTA chì e scole materne sò e fundazione di e pulitiche difese par u muvimentu naziunale da poi sempre, u nostru muvimentu puliticu hè sempre statu  à prò di a lingua è d'una sucetà bislingua, spiecata in parechji puntu in u Corsica 21.
 
Par compie, Pè a Corsica hà prisintatu una muzione nantu à stu tema à a sessione d'aprile di l’Assemblea di Corsica, chì ghjè stata bella sicura, vutata in maiurità.
 
Avemu un paese da fà! Ma u vulemu cù a Nostra Lingua!
Ùn ci sfiataremu mai chì sarà sempre a nostra primura!
Lingua Corsa lingua di tutti!
Parchè persa a lingua,  persu u populu !
In lotta par una sucetà bislingua saremu sempre.....
 
*CORSICA LIBERA
18 juin 2018