"Itinérance" : quandu l'arte si transporte in i carrughu di Lumiu

Ma nanzu l'apertura ufficiale, ci vulia girandulà, ozià è spassighjà attraversu i carrughji magnifichi di Lumiu per scopre, sott'à una loghja o annant'à una tarrazza, cù Calvi in tela di fondu, l'espusizione d'unu di l'artisti prisenti. 

" Itinérance hè un festivale d'arte cuntempuraneu, cù un cuncettu uriginale. Tuttu si passe in e strette, indè i giardini, o belli lochi diversi di u paese, certe volte impristati da particulari," indicheghje Marlène Pujol, a presidente. 

Artisti lucali ma ancu internaziunali per certi, più o menu cunnisciuti, venenu vulinteri per quell'avenimentu. "Quist'annu, sò 26 à facci scopre e so opere, cù Antoine Pallavicini in cumpare". 

Di u latu di l'artisti, ghjè un piacè tamantu.  

" Participeghju dipò a siconda edizione. U cuncettu m'hà viramente piaciutu, aghju fattu belli scontri è ci permette in più, di riscopre u paese di Lumiu. Ghjè vera chì si passe spessu davanti senza mai piantassi. Dipò, aghju dinò integratu u scagnu urgansizatore" spieche Marcè Lepidi. 

Per Antoine Pallavicini, ghjè un azzione immanchevule. "Hè impurtante di sustene manifestazione artistiche chì artisti talentuosi sò parechji in Corsica. Ci vole à falli cunnosci è mustrà i so travaglii. Ghjè dinò strasurdinariu di pudè spone indè lochi uriginali, è ghjè piacevule di fà ancu participà a pupulazione cù l'imprestu di quelli lochi". 

À 8ore si sera, s'hè fatta dunque l'inauguration ufficiale d'Itinerance, in piazza di u paese. 

" Ghjè una bella riescita chì tocche u paese sanu. Tengu à felicitavvi chì ghè una manifestazione chì si scrive indè u nostru calendariu" hà compiu u merre Etienne Suzzoni. 

" Ringraziemu i nostri soci. A Casa Cumuna di Lumiu, Cap Corse Mattei, è Panetterie l'Amadeus, clos Culombu, è Marcellu Lepidi". 

Per l'edizione da vene, sempre per Pendicoste, e candidature si ponu fà annant'à a pagina Facebook di a présidente.