I Catari : I chjassi di a salute per Inseme

Dumaitini, l'appuntamentu di a marchja caritativa à prufittu di l'associu " Inseme" hè datu per quist'annu in u paese di I Catari.   
6 chilometri di spassighjata attraversu i vechji chjassi cumunali, nanzu di sparte, à termine, un pranzu d'amicizia ind'a corte di a salla di e feste.  L'iscrizzione saranu aparte à partesi di 9ore 30, sott'à a quella salla. 
10 euro per i maiò, gratuitu per i zitelli.   
" Tenimu à ringrazià sopratuttu e persone chì anu pulitu i chjassi, è chì ci permettenu di gode di stu bellu locu" hà precisatu Pasquà Carlotti, unu di l'urganizadore di l'evenimentu.