I Santi : Sant'Odone, Santu Fredianu

Subitu eletti eranu in periculu. U velenu era à a moda. Tenianu un annu, dui, trè, è po, un bellu ghjornu, una disgrazia i mandava in l'altru mondu.
Odone era figliolu d'un signoru di a Turena. Da chjucu, u babbu l'avia cunsacratu à San Martinu. À l'età di 20 anni, era unu di i 150 canonichi prebendati chì curavanu, in Turone, a tomba di u santu.
À 30, Odone si face frate. L'annu dopu si trova in Cluniaccu, - oghje Cluny - a celebre abbazia benedittina chì venia d'esse creata da u duca d'Acquittania, è rifurmata da San Bernone.
Dicessette anni dopu, Odone succede à Bernone, è dà à l'abbazia, un'urganizazione tale chì, per dui seculi, averà una grande autorità, micca solu in l'affari di a Chjesa, ma dinù in a pulitica di i Stati eurupei.
Odone era un urganizatore di prima trinca, fermu, severu, ma attempu era un omu alegru. In recreaziò, passava u so tempu à cuntà stucciuli è à fà ride i frati. Tutta a so vita, hà scrittu puesie è musica.
À l'età di 63 anni, si truvava in Roma pè a quarta volta, quand'ellu si rese contu ch'ellu avia più pocu à campà. Si spicciò di parte, è ghjuntu nant'à a tomba di San Martinu, si morse. Era u 18 nuvembre di l'annu 942.
In Corsica, u 18 nuvembre, si festighjava dinù à Fredianu, chì ghjè u santu padrone di Casaglione.

San Fredianu era un frate irlandese di u seculu sestu, forse figliolu di rè, venutu in Roma, una prima volta in pelegrinaggiu, una seconda per studià. Tandu, ùn turnò più indì u so paese. Si stabilì accant'à Lucca, aldifora di l'accintu rumanu è, cù i so discepuli fece una chjesa dedicata à San Vincensiu, chjesa chì, oghje, porta u so nome. L'annu 560 fù fattu vescu di Lucca. Dece anni dopu, a regione fù invasa da i Lombardi. Ellu, ùn ebbe altra premura chè di cunverteli.
Un annu chì u fiume chjamatu Serchio sburdava è minacciava a cità, Fredianu li fece cambià di lettu cù un semplice colpu di vanga. Quessa hè a legenda, ma a verità dev'esse chì, grazia à i studii fatti in Roma, fece fà travagli facili per una deviazione chì dete l'acqua, è dunque a prusperità, à a campagna di Lucca.
San Fredianu hè mortu in Lucca u 18 marzu di l'annu 588. A festa hè celebrata u 18 nuvembre, anniversariu di a traslazione di e so reliquie à u seculu VIII.
Retrouvez l'émission I Santi sur Voce Nustrale  du lundi au samedi à 10h30.