L'anniversarii : 12 di Ferraghju

02-1987
Muria, à 56 anni, Pierrette Jeoffroy-Faggianelli, prufessore à a Sorbona.
Pierrette Jeoffroy-Faggianelli avia publicatu:
- Contes corses,
- D'amour et de mort,
- Techniques de l'expression et de la communication,
- Méthodologie de l'expression.
Ma per noi, a so opera maestra hè "L'image de la Corse dans la littérature romantique française". In stu libru di 446 pagine, face un'analisa di tuttu ciò chì i Francesi anu scrittu nant'à a Corsica da u 1729 à u 1840, da Goury de Champgrand à Victor Hugo, passendu per Chateaubriand, Mérimée, Balzac, Flaubert è tant'altri, in tuttu 200 scrittori chì anu fattu cunnosce a Corsica, ognunu à a so manera, favulosa o tragica, rumanesca o rumantica, ciò chì face chì, anch'oghje, un seculu è mezu dopu a morte di Napulione, o l'edizione di a Colombà di Prosper Mérimée "L'image de la Corse" hè una fiura, un ritrattu, veru qualchì volta, falzu pè u più, ma sempre marcatu da quell'epica rumantica.
Sò sempre vere e parulle d'Elliot, u vicirè di u regnu anglocorsu, chì disse, in u 1796, chì a Corsica era un'enigma, è chì nimu pudia pretende d'avenne a chjave.
A prova si n'hè chì, più d'un seculu è mezu dopu, Malraux dicia parlendu di De Gaulle: De Gaulle avait son mystère comme nous avons la Corse. Il y avait en lui un domaine étrange dont on savait qu'on ne l'éclairerait jamais. C'est cela que j'appelle la Corse.
Pocu nanzu di more, Pierrette Jeoffroy-Faggianelli avia segnatu un prefaziu pè un libru chì tratta di a storia di u so paese: Zicavu.