Un’ambizione nova per l’EME-IAE di Corsica

Hè una piccula rivuluzione à l’Università di Corsica. I studienti chì si volenu furmà à u maneghjimentu averanu oramai un’offerta di furmazione nova à l’Istitutu d’Amministrazione di l’Intraprese (IAE) di Corsica.
Cù a rientrata di u 2019, diventa st’arnese pedagogicu di l’Università di Corsica l'« EME-IAE / Scola di Maneghjimentu è d’Ecunumia ». Arrimbata à u mondu di l’intrapresa, seguiteghja a listessa via sta versione nova di l’IAE di Corsica : porghje à i studienti e cunniscenze fundamentale in maneghjimentu, appruntà li à e funzione d’inquadramentu è di direzzione di l’intraprese, di l’urganisazione o di e stituzione publiche o private.  

A nuvità a più maiò : a filiera d’ecunumia è di gestione, arrimbata fin’à avà à l’UFR di dirittu di l’Università di Corsica, hà da integrà l’EME-IAE, chì hà da prupone furmazione subbitu à a prima annata di licenza è fin’à a seconda annata di Master. S’ella risponde st’offerta nova à l’esigenza di creà diplomi nant’à cinqu’anni, vulsuta da a reta IAE Francia, chì adunisce 35 Istituti d’Admministrazione di l’Intraprese inde u paese sanu, currisponde dinù à una strategia di l’Università di Corsica per accresce a cuerenza di i so parcorsi d’insignamentu.
« Ci deve permette l’integrazione di sta licenza d’ecunumia è di gestione di avvicinà di più e furmazione chì sò digià vicine in quantu à i so insignamenti per esse di più perfurmanti, spieca Jean-Marie Furt, u direttore di l’EME-IAE. U fattu di prupone furmazione subbitu cù a licenza s’arremba dinù à una logica chì cunsiste à assicurà a perennità di l’EME-IAE, chì ci si pudia accede solu à u livellu Master fin’à avà. Hè un’imbusca à tempu per gestisce megliu l’effettivi è a selezzione di i candidati ».


Hà da permette l’integrazione di a filiera d’ecunumia è di gestione à l’EME-IAE di Corsica di accoglie più di 300 studienti per a rientrata di u 2019, vale à dì u doppiu di l’effettivi di l’annu scorsu.
À u prugramma : sette furmazione chì vanu da l’ecunumia appiecata à i mistieri di u turisimu, passendu per u maneghjimentu, e risorze umane è u marketing. Per via di sta « versione » nova, hà da circà di prupone parcorsi di più adattati à l’attese di i studienti.

Altra nuvità di a Scola di Maneghjimentu è d’Ecunumia : a messa in ballu di un sughjornu à l’internaziunale, per via di un staziu o di un viaghju di studii, ubligatoriu per buscà si un diploma à l’EME- IAE. U scopu : si tratta di permette à i studienti di avè una sperienza à u strangeru, cù una funzione inde un’intrapresa, un’amministrazione o fendu puru una furmazione.  

Fin’à avà, cercavanu à avè una sperienza internaziunale menu di 10 % di i studienti di l’IAE, chì s’arrimbava u dispusitivu à u vuluntariatu. Avà, serà sta tappa un passeghju d’obligu per tutti l’effettivi di l’EME-IAE.


Ma, al di là di a sola maestria di e lingue strangere, per via di sti sughjorni à l’internaziunale, face soprattuttu a Scola a scumessa di fà scopre nove culture ecunomiche è di cunfruntà i studienti cù ambianti novi d’intraprese. « Pò creà una sperienza à u livellu internaziunale una sorte d’intuppu culturale chì ferà prò à i studienti, cunsidereghja Jean-Marie Furt. U fattu d’evuluà inde un’intra- presa o un’amministrazione strangera permette di impadrunì si manere nove di travaglià è pra- tiche sfarente, à le volte innuvante, ch’ellu si puderà sparghje in Corsica o in altrò. S’elli s’impadru- niscenu i studienti di st’opportunità, pò diventà per via di un effettu di massa una sorza per porghje ricchezze à u nostru territoriu »