A Cunsulta di a Ghjuventù Corsa cumunicheghja :
Noi, Cunsulta di a Ghjuventù Corsa, ci battimu dapoi a nostra creazione per a difesa di a lingua corsa. U nostru sindicatu lutterà sempre per pudè mantene l’insignamentu di a lingua è di a cultura corsa di manera ubligatoria. Sapemu chì a salvezza di u populu corsu sì ferà cù una lingua corsa viva. Di fattu per noi i detti di u ministru di l’internu, Manuel Valls, sò simpliciamente parolle debule di sensu. A dimu di manera chjara, sò parolle giacobine. Ogni volta chè vo pigliate a parolla annantu à l’atualità isulana, ci mustrate chè vo site un incapace. Ùn avemu micca bisognu di lezzione date da a francia. Se voi, riprisentanti di u statu culuniale, ùn vulete micca salvà a lingua corsa, vale à dì chè vulete tumbà u populu corsu, è per noi què hè inaccettevule ! Ùn vulete micca duie lingue annantu à l’isula ? Allora parleremu solu a nostra lingua, a lingua corsa. U 17 di maghju avemu avutu una brama di sperenza per l'emancipazione di a nostra ghjuventù ind'è un embiu culturale corsu. È ùn hè micca cù e vostre infime parolle chè a decisione di u populu corsu cambierà, vulemu una lingua corsa ufficiale, è l’averemu !
LOTTA GHJUVENTÙ, L'AVVENE SÌ TÙ
