L'anniversarii : 13 di Ferraghju

02-1984
Libois, di l'Università di Liegi, prisentava una tesa cù u titulu "Essai synécologique sur les micromammifères d'Europe atlantique et ouest Méditerranée", tesa publicata cù u titulu più semplice: "Le régime alimentaire da la chouette Effraie".
U studiu di Libois hè statu fattu in trè lochi: a Belgica, a Corsica è i Pirenei.
La chouette Effraie, in Corsica si chjama malacella bianca, o caccavichjula, bubbula, strisge, è nottula.
Per sapè ciò ch'iss'ocellu manghja, Libois hà studiatu i so cacati in pallottule in 35 lochi, da a punta di Barcaghju à Sotta, da Aleria à u Pediquerciu, è, in altitudine, da u bordimare à Aiti. Pè u più si nutrisce di tuparelli (les souris), topi (les rats noirs) è topi campagnoli (les mulots). À l'occasione, manghja qualchì granochja, o ruspu, qualchì ocellu, o qualchì insettu.
U studiu di Libois permette d'avè a ripartizione in Corsica di tutte e razze di topi. Per sapenne di più, ùn c'hè chè da leghje un strattu di a so tesa in u Bulletin de la Société des Sciences, numeru 649.